فاروق خېل                               

نوم مې احمدشاه؛ ځينې خلک مې د عرفانيار په نوم پېژني، خو پر چا چې ډېر ګران يم هغه بيا راته له ډېر نازه يواځې عرفان وايي. د ميدان وردګو ولايت د مرکز ميدان‌ښار اړوند د فاروق خېلو په کلي کې؛ نه پوهېږم چې څو کاله وړاندې به و، خو د زوګړې نېټه مې پلار جان لیکلې هغه هم په همغه کلیزه (جنتري) کې چې ورسره وه، هغه نېټه ده ۱۳۶۱/۰۹/۱۱، چې پر کلي د مني سړو بادونو د شنه موسم هر څه يې له منځه وړل، نو په کلي کې چا داسې غږ پورته کړ چې د مني په دې سړو شېبو کې يو ګل وغړېد.
دا چې د پلار لومړنى زوى وم، نو زما له زوګړې سره سم زمونږ کليوالو د ټوپک ډېرې ډزې وکړې، او په رښتيا تر هر چا ډېره مې مور جانه خوشاله وه.
بس همغه و شپې ورځې تېرېدې، ان چې ١٣٨٨ کال راورسېد او د کابل پوهنتون د ژورناليزم له پوهنځۍ خلاص شوم، په دې جريان کې د ژوند بېلابېلې خوږې او ترخې شېبې وې چې د معمول په څېر تېرېدې، کله کله به مې قلم څه ليکل، چې زما پر وړاندې به ډېرو ملګرو د دې ليکلو توصیف کاوه چې يو شمېر ملګرو دې ته هڅولم څو يو وېبلاک ولرم، او ځينې وخت ملګري زما ليکنې ولولي، نو د خپل کلي په نوم ((فاروق خېل)) مې يو وېبلاک جوړ او لږې ډېرې ليکنې او هغه ليکل چې د خپل هېواد او خپلې سېمې په اړه لرم ورته خپاره يې کړم.
هيله ده چې په ليدو او لوستو يې ستړي نه شئ.

برښناليک: erfanyar001@gmail.com
د اړيکې شمېره: 0093799006789